ງານແຂ່ງຂັນເຮືອຊ່ວງ ປະເພນີ ປະຈຳປີ 2023 ທີ່ເມືອງປາກແບງ ແຂວງອຸດົມໄຊ ໄດ້ຈັດຂຶ້ນໃນວັນທີ່ 30 ກັນຍາ ປີ 2023 ທີ່ທ່າເຮືອປາກແບງ ໂດຍພາຍໃຕ້ການເປັນປະທານຂອງທ່ານ ສຸກສະຫວັນ ທີວມະນີສືງຮອງເຈົ້າເມືອງ ເມືອງປາກແບງ. ເປັນກຽດເຂົ້າຮ່ວມມີທ່ານ ນາງ ຈັນສະໝອນ ທິບພະຫົງ ກຳມະການປະຈຳພັກ ແຂວງ, ປະທານກວດກາພັກລັດແຂວງ, ທ່ານ ຄໍາສະພອນ ໄຊຍະວົງ ເຈົ້າເມືອງປາກແບງ, ພ້ອມດ້ວຍ ເຈົ້າເມືອງ ຮອງເຈົ້າເມືອງ 7 ເມືອງ ແລະ ແຂກເຊີນ ຈາກບັນດາພະແນກການ, ອົງການຈັດຕັ້ງຂັ້ນແຂວງ,ເມືອງຕະຫຼອດຮອດນັກທຸລະກິດ ຜູ້ປະກອບການ ແລະ ສີພາຍເຮືອຊ່ວງຈາກບັນດາບ້ານອ້ອມຂ້າງເມືອງເຂົ້າຮ່ວມ .
ການຈັດການແຂ່ງຂັນຊ່ວງເຮືອປະເພນີ ຂອງເມືອງປາກແບງປະຈຳປີນີ້ ລວມມີທິມນັກກິລາເຂົ້າຮ່ວມທັງໝົດ 7 ທີມເຊິ່ງລວມມີ: ທີມບ້ານປາກແບງ1, ທີມບ້ານປາກແບງ2, ທີມບ້ານປາກເງີຍ1, ທີມບ້ານປາກເງີຍ2, ທີມກຸ່ມການເມືອງ,ທີມກຸ່ມວັດທະນະທໍາແລະທີມກຸ່ມເສດຖະກິດ. ມີເຮືອຊ່ວງທັງໝົດຈຳນວນ 6 ລໍາ, ລວມມີນັກສີພາຍທັງໝົດ 294 ຄົນ.
ຜ່ານການແຂ່ງຂັນ ເປັນເວລາ 1 ວັນ ຜົນປາວ່າ ທີມຊະນະເລີດ ໄດ້ແກ່ທີມ ບ້ານປາກເງີຍ 1 ໄດ້ຮັບລາງວັນເປັນເງິນສົດຈຳນວນ 6.000. 000 ກີບ ພ້ອມດ້ວຍ ຂັນແຊມ 1 ໜ່ວຍ ແລະ ຂັນຄອງອີກໜຶ່ງໜ່ວຍ, ທີ2 ໄດ້ແກ່ທີມປາກແບງ 2 ໄດ້ຮັບເງິນສົດຈຳນວນ 5.000.000 ກີບ ພ້ອມຂັນ 1 ໜ່ວຍ, ທີ 3 ໄດ້ແກ່ ທີມ ບ້ານປາກເງີຍ 2 ໄດ້ຮັບເງີນສົດຈຳນວນ 4.000.000 ກີບ, ທີ 4 ໄດ້ແກ່ ທີມປາກແບງ 1 ໄດ້ຮັບເງີນສົດ 3,000,000 ກີບ.ນອກນັ້ນ ແມ່ນໄດ້ຮັບລາງວັນຊົມເຊີຍທີມລະ 2,000,000 ກີບ. ໃຫ້ກຽດມອບລາງວັນ ໂດຍແມ່ນຄະນະປະທານຈັດງານ ແລະ ການນຳຂອງເມືອງ.
ການແຂ່ງຂັນຊ່ວງເຮືອປະເພນີທີ່ເມືອງປາກແບງ ແຂວງອຸດົມໄຊ ແມ່ນໄດ້ຈັດຂື້ນໃນທ້າຍເດືອນ ກັນຍາຂອງທຸກໆປີ ເຊີ່ງກາຍເປັນປະເພນີອັນທີ່ສຳຄັນຂອງຊາວເມືອງປາກແບງທີ່ໄດ້ສືບທອດມາແຕ່ດົນນານ ແລະ ເປັນເອກະລັກທາງດ້ານວັດທະນະທໍາ ຮີດຄອງປະເພນີອັນດີງາມຂອງຊາດລາວເຮົາມາແຕ່ບູຮານນະການ ເວົ້າລວມ ເວົ້າສະເພາະແມ່ນ ເມືອງປາກແບງ ແຂວງອຸດົມໄຊ , ທັງເປັນການສົ່ງເສີມທາງດ້ານກິລາກາຍຍະກຳ ເພື່ອສ້າງບັນຍາກາດເບີກບານມ່ວນຊື່ນ, ສ້າງຄວາມ ສາມັກຄີ ມິດຕະພາບອັນດູດດື່ມກັບຊັ້ນຄົນຕ່າງໆ ຕິດພັນກັບການຊຸກຍູ້, ສົ່ງເສີມ ວຽກງານການທ່ອງທ່ຽວ ເພື່ອໃຫ້ນັກທ່ອງທ່ຽວທັງພາຍໃນ ແລະ ຕ່າງປະເທດ ເຂົ້າມາທ່ຽວຊົມເມືອງປາກແບ່ງນັບມື້ຫຼາຍຂຶ້ນເລື້ອຍໆ.
